​«حدوتة قبل النوم».. «أنس ولد نظيف»

كل أم تجد صعوبة في نوم أطفالها، إليكِ حلا سحريًا للأخذ بيد طفلك إلى عالم الأحلام والنوم الهادئ.. «شيماء عبد العال» تقدم مجموعة قصص يومية تساعدك على ذلك:

حدوتة النهاردة... «أنس ولد نظيف»

كان ياما كان، كان في زمان ولد اسمه أنس، أنس كان ولد جميل ومؤدب وبيسمع كلام مامته و باباه عشان كدة كانوا بيكأفئوه دايما وبيجيبولوه الحاجات الحلوة اللي بيحبها وبيفسحوه في الاماكن اللي هو بيحب يروحها.

و في يوم من الايام قرر باباه و مامته ينزلوا يشترلوا لبس جديد لأنس عشان العيد قرب، ركبوا العربية ولما وصلوا للمكان اللي عايزينه ركنوا العربية ونزلوا يتمشوا ويتفرجوا علي المحلات، بابا أنس دخل سوبر ماركت و جابلوا شوية حاجات حلوة ياكلوها وهما بيتمشوا، اكل منها أنس شوية حاجات و بعد ما خلص قام رامي الاكياس الفاضية في الارض وهو ماشي.

مامته اتفاجأت بتصرفه ده و قالتلوا يا أنس ايه اللي انت عملته ده، مش انا و انت متفقين اننا نحافظ علي نظافه اي مكان نقعد فيه سواء قاعدين في بيتنا او النادي او ماشيين في الشارع او لو حتي قاعدين علي شاطئ البحر، قالها انس ايوة يا ماما حضرتك قولتيلي كدة بس ده لو كان المكان اللي انا فيه اصلا نظيف لكن الشارع زي ما منتي شايفة يا ماما مليان زبالة و اكياس و علب فاضية، يبقي احافظ علي نظافه ايه بقي، لما المكان اصلا اهو مش نظيف.

قالتلوا مامته لا ياحبيبي انت فهمتني غلط، انت لازم تحافظ علي نظافه اي مكان بتقعد فيه بانك مترميش اي فضلات اكل او اكياس او اوراق و علب فاضية في المكان حتي لو المكان اصلا مش نظيف، لان النظافة من الايمان، لان ناس كتير بتفتكر النظافه يعني ان شكلي يبقي نظيف و بيتي يبقي نظيف وبس وملهومش دعوة بأي مكان تاني، وميعرفوش ان النظافه يعني احافظ علي نظافه الشارع اللي بمشي فيه والحديقة اللي بتفسح فيها والنادي والمدرسة حتي شاطئ البحر لما بنروح المصيف، لان احنا بنروح الاماكن دي عشان نتبسط و نغير جو و نشوف مناظر جميلة مش عشان نشوف الزبالة، فلو كل واحد فينا اكل او شرب حاجه يحطها في كيس و يدور علي اقرب باسكت زبالة و يرميها فيها هيلاقي نفسه قاعد في مكان نظيف و غيره هيجي يلاقي المكان نظيف و هكذا.

رد أنس و قالها عندك حق يا ماما فاكرة الحديقة اللي روحنها اخر مرة ولاقيناها مليانة ورق واكياس فاضية وزبالة في كل مكان ومشينا لاننا طول ما احنا بنتمشي فيها كنا بندوس برجلينا علي الزبالة، قالتلوا مامته طبعا فكراها سأل أنس مامته و قالها طيب يا ماما مش المفروض كل مكان بيبقي فيه عمال مهمتهم تنظيف المكان، قالتلوا فعلا بيبقي فيه بس مش معني كدة اننا منهتمش بالمكان و نقول هما ينضفوا ورانا بقي، قالها طيب يا ماما مش هي دي شغلته مش هو الزبال، قالتلوا لا ياحبيبي مش اسمه زبال، الزبال هو اللي بيرمي الزباله والقمامة، لكن هو اسمه عامل النظافه لان هو اللي بينظف الاماكن، ولو تلاحظ يا أنس ان بيبقي اغلبهم ناس كبار في السن و بيشتغلوا الشغلانة دي عشان عايزين يكسبوا فلوس حلال، فتخيل بقي يا أنس كل ورقه مثلا انت بترميها بتتسبب في ان العامل ده يوطي ويلمها وراك من الارض واحنا لازم نرحمهم برضه ده الراحمون يرحمهم الله.

اشتري أنس لبس العيد و روح البيت وهو فرحان مش بس باللبس الجديد لا و بالدرس الجديد اللي اتعلمه النهاردة من مامته وقرر انه يعلمه لكل اصحابه في النادي و في المدرسة.