للاسف احنا بنظلم اولادنا اقراوا الموقف ده و حطوا نفسكم مكان الطفل

الموقف ده مهم جدا وحتعلموا منه كتير لاننا فعلا كتير مننا مقصر في النقطة دى مع اولاده

الموضوع كالآتي ..

في الميكروباص اثناء النزول من المقطم ،
ولد صغير سنه ما بين الاربع أو الخمس سنين , قاعد علي رجل مامته .
شكلهم بسيط جدًا و حالهم المادي مش بطال .
هو فاتح الشباك علي الآخر و باصص للسما و مبتسم و شوية يطلع ايده و يطيرها في الهوا و بعدها يجيب لعبته ،باز يطير، و يقوله : "يلا يا باز .. الي الانهائية و ما بعدها .. ادي اشارة لمحمود اننا جايين في الطريق عشان ميقلقش اني أتأخرت عليه" .

الطفل كان مسلي جدا و بيلاعب نفسه .
شوية و جت مرحلة اننا وقفنا في اشارة و زهق و بدأ يسأل مامته أسئلة كتير أوي .
الأسئلة مكنتش تافهة اطلاقا بالنسبة لطفل في سنه , بالعكس , تكاد تكون عبقرية كمان :

"هما ليه بنوا المبني الي تحت دة .. هشوف القلعة ازاي من فوق .. غطوا عليها"
"ليه عمو معملش الطريق علي طول , بدل كل شوية نمشي يمين و شمال"
"هي ودني اتسدت ليه و أنا نازل من فوق"
"ليه السيجارة بتخليني أكح و الواد الي بيشربها قدامي دة مبيكحش"

مامته مكنتش بترد عليه و لا حتي بصاله كأنه مش موجود و عماله تخبطه كدة علي كتفه عشان يسكت.
و سأل تاني : " طب هو المقطم ليه فيه جبال كتير كدة ؟" .

فالأم فقدت أعصابها و برئتله و قالتله : " عشان العيال الصغيرة الي زيك الي مش بتبطل كلام بيقوموا خطفنها و ياخدوها في مكان ضلمة و يضربوهم و يقعدوا يعزبوا فيهم لحد ميموتوا و يدفنوهم , فمحدش يشوفهم و لا يعرف عنهم حاجة و ساعات بيحرقوا الجثة كمان " .

فالولد اتلبش كدة كام دقيقة و قعد الطريق كله منطقش ولا كلمة و الي متأكدة منه انه عمال بيتخيل المشهد الي مامته بتحكي عليه .

الطفل الي أحلامه بسيطة و بيبعت عبر الموجات، اشارة لصديقه ,
و اللي بيتفكر في علم الفيزيا و حابب يعرف سر الضغط الجوي ,
و الي شايف اانه قرار مش صح للحكومة انها تبني في مكان زي دة مبني , عشان بتضيع جمال المنظر ,
اللي هيعرف أضرار السجارة و ان محتويات الدخان الي خارج منها هي النيكوتين و أول أكسيد الكربون و يعتبروا سلاحين للتسبب في الوفاة و عشان كدة بيكح ,

تفكيره وقف عند النقطة دي !!!
و بدأ يتخيل عصابة و دم و مقابر و سواد و عنف .

عشان دة بيحاكي الواقع الي احنا فيه .
و الاطفال مش بتتربي صح إطلاقا والأم الي جوزها مطلع عينها و الأزمة المالية و المشاكل النفسية الي عندها .. مش بتخليها قادرة تركز مع ابنها دقيقتين بس .. و تفصل دة عن التربية .
جو الساحرة الشريرة و العو هيكلك و لو مكملتش طبقك هتتسخط سلعوة دة لازم ينقرض .

الولد و هو نازل نسي لعبته في الكنبة الي ورا .